Түркия президенті Режеп Тайып Ердоған сейсенбі күні Сирияда қабылданған атысты тоқтату келісімін құптайтынын айтып, бұл бітімнің қантөгісті тоқтатып, тұрақты шешімге жол ашуына үміт білдірді.
Сәрсенбі күні Ұлы Ұлттық мәжілісте биліктегі Әділет және даму партиясына қарата сөйлеген Ердоған Анкараның әу бастан Сирия мемлекетінің аумақтық тұтастығы мен саяси бірлігінің сақталуын қолдап келе жатқанын мәлімдеді.
Сирия президенттігі сейсенбі күні YPG лаңкестік ұйымымен мәмілеге келгенін, Хасакенің интеграциясы бойынша жол картасын әзірлеу үшін YPG-ге төрт күн берілгенін және осы уақыт аралығында атысты тоқтату режимі күшінде болатынын хабарлады. Ал YPG кейінірек жасаған мәлімдемесінде бітімді толық сақтайтынын айтты.
Президент Ердоған бұдан кейін Сирияда қандай да бір арандатушылық әрекетке бару өз-өзіне қол жұмсаумен тең болатынын ескертіп, тұрақтылықты сақтау қажеттігін атап өтті.
Ол толық интеграцияның жаңа кезеңнің басталуын айғақтайтынын және тұрақтылықтың орнауы ең алдымен Сириядағы күрдтер үшін маңызды екенін айтты.
«Біздің ешбір елдің аумағында мүддеміз жоқ және ешбір мемлекеттің ішкі ісіне араласпаймыз, бірақ еліміздің мүдделеріне нұқсан келуіне жол бермейміз», – деді Ердоған.
Ердоған сондай-ақ АҚШ президенті Дональд Трамппен телефон арқылы сөйлескенін, телефон әңгімесінде Сирияның қауіпсіздігіне үлес қосатын түрлі мәселелер, соның ішінде ДАИШ-пен күрестегі бірлескен күш-жігер сияқты тақырыптар талқыланғанын жеткізді.
