АҚШ президенті Дональд Трамп жақын уақытта Ирандағы стратегиялық маңызы бар инфрақұрылым нысандарына шабуыл жасалуы мүмкін екенін айтты.
Бейсенбі күні «Truth Social» желісінде жазба қалдырған Трамп: «Біздің қарулы күштеріміз – әлемдегі ең қуатты әрі ең ірі армия. Біз Иранда қалған нысандарды жоюды әлі бастаған жоқпыз. Келесі кезекте көпірлер, одан кейін электр станциялары тұр. Жаңа билік не істеу керектігін біледі және оны тез арада жүзеге асыруы тиіс»,- деді.
Бұл мәлімдеме 28 ақпанда басталған «Operation Epic Fury» операциясына байланысты халыққа үндеуінен бір күн өткен соң жасалды.
Трамп үндеуінде «Алдағы екі-үш аптада біз оларға өте ауыр соққы жасаймыз. Оларды лайық болған Тас дәуіріне қайтарамыз», – деген болатын.
Бұған дейін 100-ден астам халықаралық құқық сарапшысы АҚШ-тың Иранға қарсы әрекеттері соғыс қылмысы ретінде бағалануы мүмкін екенін ескерткен еді.
Олар жариялаған хатта «Күн сайын АҚШ-тың салық төлеушілеріне 1–2 миллиард доллар шығын әкеліп отырған бұл соғыс бейбіт тұрғындарға айтарлықтай зиян келтіріп, Таяу Шығыста жүздеген адамның қаза табуына себеп болды. Сондай-ақ экологиялық және экономикалық тұрғыдан зиян келтіруде», – делінген.
